GERARDO MARKULETA

BATAK EZ DU
BESTEA KENTZEN

✺

POESIA

Idazlan honek Joseba Jaka IV. Literatur beka jaso du,
poesia alorrean

A L B E R D A N I A

Bitartean ibillico dira becatutic becatura amilduaz; oraiñ
pensamentu batean gueroseago itz loyak gozotoro adi­tzean:oraiñ escuca, edo queñada batean, guero musu edo laztanetan: oraiñ
ipui ciquiñac contatzen, guero dantzan, edo dantza ondoan
alberdanian.

(J.B. Agirre)

Eusko Jaurlaritzako Kultura Sailaren laguntza
izan du liburu honek.

Azala: Antton Olariaga

© 2003, Gerardo Markuleta Gutiérrez

© 2003, Euskalgintza Elkarlanean Fundazioa

© Edizio honena: 2003, EUSKALGINTZA ELKARLANEAN FUNDAZIOA &
ALBERDANIA, S.L.

ISBN digitala: 978-84-9868-569-5

ISBN papera: 84-95589-83-4

Legezko Gordailua: S.S. 1407/2003

BATAK EZ DU
BESTEA KENTZEN

I
iferneguan

Neguaren gnomoa agertu zen orduan, eta esan zidan:

“Entzudazu. Nik izoztuta utzi zintzaket. Baina, horren ordez,
elurraren gaineko kaligrafia eder bat erakutsiko dizut”.

Harry Martinson

Inoiz sobera

Hemen, inoiz, sobera da argia,

argi sobera da. Ez naiz sekula izan

zure betazalen bestaldean.

Desegunetan

Desegunetan beti da desordu;

ez huen egin,

ez huen esan,

ez huen jakin.

Destenorean, guztia desarau;

ausartu bahintz,

bukatu bahu,

iritsi balitz.

Desgaraian, dena desegoki:

deserrotze,

desitxura,

desbide;

desenkusa,

desengainu,

desditxa.

Partitzeko tenorean

Zapatak erantzi ditu suizidak

hegara baino lehen,

eta bata bestearen ondoan

ezarri, lerro-lerro, mundu hau

bere ausentziaz

txukunago utzi nahi balu legez.

Orduan

Lantzean behin itzala zen

haren begien hondoan;

bagenekien:

ez genuen luzaroan

haren musurik hartuko.

Orduan, goizaldean zen

telebistatik ohera,

etxe hoztuan,

goikoaren dutxa hotsak

abisu eman eta laster.

Atean “ongi etorri”

barruko aldera begira

jarria zuen.

Munduaren besarkada

behar zuen irtetean.

“Parentesi artekoak”,

hala esaten zien berak,

ezpain artean,

hartaz berba egiteko

adorea pilatzean.

Isil pozez hartua zen

betiko lagunartera

berriz biltzean;

erantzunak urriago,

galdekizun berak etsai.

Beldurraren etxean

Beldurraren etxean

epelik ez da;

bustirik ohe guztiak,

sukaldean lau sega.

Beldurraren mortuan